Сидакъхэ я лъэпкъыр, зэры-адыгэу дызыщыгуфIыкIын хъыбар хьэлэмэт иджыблагъэ Марокко къэралым хыхьэ Касабланкэ къалэм къикIыу къытIэрыхьащ.

Мыбдеж щекIуэкIа, спорт самбокIэ Дуней псом и чемпионатым дыщэ медал къыщилъэщащ, чемпионыцIэр щызыIэригъэхьащ ди лъэпкъэкъу спорстмен лъэрыхь, Хьэбэз къуажэм щыщ Сидакъ Iэзэмэт.

Спорсменыр мы зэхьэзэхуэм хэтащ Ставрополь крайм къыбгъэдэкIыу.

Зэхьэзэхуэр щакIуэгъуэм (ноябрым) и 13-15 махуэхэм екIуэкIащ. Азэмэт зыкъыщигъэлъэгъуащ зи хьэлъагъыр килограмм 74-рэ хъу гупым хэту.

— Самбо спорт лIэужьыгъуэм и телъыджагъыр абдеж къыщекIуэкI зэпэщIэтыныгъэм и щытыкIэм напIэзыпIэм зихъуэжынкIэ Iэмал зэрыщыIэращ. ДыщIэпсэур нобэ ди нэгу щIэкIа щытыкIэ зырызым хуэдэщ! Сегупсысащ: «Финалым сынэсагъэххэщ! СыкъыхагъащIэ хъуну атIэ?! Ар дауэ!». Сыкъезыгъэлар а гупсысэм секунд нэхъ сызэримыIыгъаращ. А гупсысэр си пкъым хэзгъэхьакъым. ЗанщIэуи си бэнэкIэм зезгъэхъуэжащ», — жиIащ Азэмэт текIуэныгъэр IэщIэлъу утыкум къикIыжа нэужь.

Финал зэпэщIэтыныгъэм деж ди лъэпкъэгъу самбистым къебэн, Iуэху зэхэщIыкI ин зыбгъэдэлъ, Азербайджан къэралым щыщ Гасымов Амил 4:1-уэ бжьыпэр иIыгът. Ауэ, зэпэщIэтыныгъэр иухыным зы дакъикъэ фIэкI къэмынэжауэ, адыгэ Iэчлъэчым и къару зрихщ, зызэщIикъуэри, бали 8 къыпэщIэтам къыфIихьыжкIэрэ, текIуэныгъэр къыIэщIихащ. Финал зэпэщIэтыныгъэр бжыгъэр 9:4-уэ, Азэмэт и текIуэныгъэкIэ иухащ.

Сидакъыр щогуфIыкI спорт самбомкIэ и япэрей дыщэ медалыр екIуу, дахэу зэрызыIэригъэхьам папщIэ.

Абидокъуэ Люсанэ.

comments powered by HyperComments