Псэужамэ, шыщхьэIум (августым) и 4-м илъэс 55-рэ ирикъунут къэрал, жылагъуэ IуэхущIакIуэ, адыгэлI щыпкъэу зи гъащIэр езыхьэкIа Шыбзыхъуэ Фрал Зул-Къэрней и къуэр.

ЦIыху пэжу, гъэсэныгъэ нэс, жэуаплыгъэ ин зыхэлъу, зытелэжьа Iуэхухэм нэгъэсауэ хэзыцIыхукIыу дунейм тета адыгэлIыр къызэрытхэмытыжрэ мы гъэм илъэси 6 ирикъуащ. Ауэ Фрал илэжьа IуэхуфIхэр, и цIыху щIыкIэу, Iуэху бгъэдыхьэкIэу щытар ноби цIыхубэм щыгъупщэкъым.

Абы къыхэкIыу, адыгэлIым и щIыхькIэ, Фрал я гум зэримыхуар ягъэщыпкъэу, шыщхьэIум и 5-6 махуэхэм Черкесск къалэм дэт «Спартак» спорт IуэхущIапIэм грэпплинг лIэужьыгъуэмкIэ чемпионат зэIуха щекIуэкIащ.

Абы къеблэгъащ СКФО-м мы спорт лIэужьыгъуэмкIэ зыщызыгъасэ спортсмен лъэрыхьхэр. Зэхэту спорт зэхьэзэхуэм спортсмен 80 хэтащ. ЗэпэщIэтыныгъэ екIухэр ирагъэкIуэкIащ Дунейпсо утыкухэм чемпионыцIэр къыщызыхьа спортсмен цIэрыIуэхэми.

Зэхьэзэхуэр къыщызэIуахым абы къеблэгъащ Федеральнэ ЗэIущIэм ФедерацэмкIэ и Советым Къэрэшей-Черкесым къыбгъэдэкIыу хэт сенатор Къэзэнокъуэ Кърым, Къэрэшей-Черкесым и Правительствэм и тхьэмадэм и къуэдзэ Уэз Мурат, республикэ Адыгэ Хасэм и пашэ Шэрджэс Мухьэмэд, Урысейм грэпплингымкIэ и Федерацэм къыбгъэдэкIа полномочнэ лIыкIуэу Ищхъэрэ Кавказ федеральнэ хэгъуэгум щыIэ Абдуллаев Мурад, Фрал и ныбжьэгъу пэжу къыдэгъуэгурыкIуа Теркъул Мухьэмэд, Джэтауэ Виктор сымэ, и къуэш Мурат, и щIалэ Беслъэн, Шыбзыхъуэхэ я лъэпкъыр.

Зэуэ жытIэнщи, сыт щыгъуи хуэдэуи, мы спорт зэхьэзэхуэр фIагъ лъагэ иIэу къызэгъэпэща хъуащ. Абы къаруушхуэ ирахьэлIащ «Clan-Warriors» профессональнэ зауакIуэ ММА клубым и президент Дер Едыдж, мы спорт гъэсапIэм и гъэсакIуэ Жу Тимур, Фрал и унагъуэм.

Спортсменхэм я зэпэщIэтыныгъэхэр гуащIэу, удэзыхьэхыу, гъэщIэгъуэну ирагъэкIуэкIащ. Гуапэ зэрыхъущи, ди республикэм щыщ спортсменхэм IэкIуэлъакIуагъ ябгъэдэлъу зэпеуэм зыкъыщагъэлъэгъуащ. Апхуэдэу, Къэрэшей-Черкесым щыщу япэ увыпIэр Хьэбэч Хъызыррэ Къардэн Азэмэтрэ къахьащ, етIуанэ увыпIэр къалъэщащ Бирагов Валерэрэ Байчорэ Мыхьэмэтрэ. Ещанэ хъуащ Хьэбэз къуажэм щыщ КIэмрыгу Рустам.

Зэхьэзэхуэм призер щыхъуахэм, текIуэныгъэр къэзылъэщахэм медалхэр, щIыхь тхылъхэр хуагъэфэщащ, ахъшэ тыгъэ хуащIащ. Япэ увыпIэр зыIэрызыгъэхьахэм кубокхэри иратащ. Тыгъэхэр спортсменхэм хуэзыгъэфэщар лъэпкъым и къуэфIхэу Дер Вячеслав, Теркъул Мухьэмэд, Шыбзыхъуэхэ Мусэрэ Алибэчрэ, Фрал и къуэш Мурат, и щIалэ Беслъэн сымэ.

_ _ _ _ _ _ _ _ _ _ _ _ _ _ _ _ _ _ _ _ _ _ _ _

Дорогие зрители канала Черкесия ТВ! Нам и впредь хотелось бы радовать Вас новыми выпусками и новыми передачами и при этом чтобы наш материал оставался доступным для всех представителей нашего народа. Поэтому мы просим Вас сделать пожертвование на развития канала. Спасибо что Вы с нами!

1 Comment

Leave a Response